REDACCIÓN | QUIROGA
O Quiroga Volei organizou este sábado un torneo amigable dirixido ás categorías infantil, cadete e xuvenil no que, ademais do club local, participaron tamén o Ribeira Sacra e o San Martiño Dompa O Barco. Tanto participantes como organización e asistentes coincidiron en cualificar de “éxito” este torneo, que non tiña carácter competitivo.
Os partidos comezaron arredor das 9:30 horas e prolongáronse ata as dúas da tarde. Foi entón cando chegou o momento da entrega de medallas para todas as participantes, que contou con dúas convidadas de luxo. Por unha banda, a xogadora quiroguesa Carolina Camino, internacional absoluta coa selección española, que é un espello para moitas das xogadoras do Quiroga Volei.
Pola outra, a capitana do combinado nacional, Patricia Aranda, que compartiu vestiario con Camino durante a última tempada no Arenal Emevé lugués. Aranda leva máis de dúas décadas na elite do voleibol nas que deu mostras do seu talento en países como España, Francia e Perú.
Nos campionatos de todos eles acabou levando o galardón de mellor colocadora, ademais do recoñecemento de público e rivais. Tamén foi designada MVP dunha liga tan esixente como a gala e da Copa da Raíña que o CV Haris gañou hai tres tempadas no Municipal de Lugo.
A nivel colectivo, o seu palmarés conta cunha Liga Iberdrola, tres Copas da Raíña, dúas Supercopas de España e segundos postos na Challenge Cup, a liga francesa e a liga peruana. A dimensión de Patricia Aranda no vóley mundial sitúaa no Top 1000 de todos os tempos do portal Volleybox, un mérito que só comparten outras sete xogadoras españolas na historia.
A presenza de Carolina Camino e Patricia Aranda xerou grande expectación entre as participantes do torneo, que tomaron numerosas fotografías con elas ao remate dos encontros.