REDACCIÓN | QUIROGA
Dende este luns está en marcha o concurso de tapas da Feira do Viño de Quiroga, que este ano chega con dúas novidades. A primeira delas é o nome, pois de chamarse Quiroga de Tapas pasa a ser Val de Quiroga de Tapas. O motivo é a incorporación de tres bares de San Clodio (Ribas de Sil), que se unirán a sete de Quiroga.
Polo tanto, haberá que pasar por dez establecementos para cubrir o tapacartón. Son Mesón Ferreiriño, O Portón, Matrioshka, A Botica, Chapakuña 3, Ruxe-Ruxe e Adega da María, de Quiroga; e A Cabina, Las Vegas e Restaurante Praia Fluvial, de San Clodio. Presentan as seguintes tapas:
- Adega de María: Primavera
- Matrioshka: Solombo ao roquefort
- Chapakuña 3: Delicias de polo ó padano
- Ferreiriño: Os praceres da nosa terra
- A Botica: Polo pan baila o can
- Ruxe-Ruxe: Piruleta Popcorn
- O Portón: Sabores do Portón
- Restaurante Praia Fluvial: Sapito
- Restaurante las Vegas: Pasapalos
- A Cabina: A Cabinita
A outra das novidades está o prezo. A tapa pasa a custar agora 2 euros, incrementándose polo tanto en 50 céntimos con respecto a edicións anteriores. Dende o departamento de Xuventude, organizador do evento, din que este incremento foi pedido polos establecementos, “que terán máis marxe para presentar ao concurso tapas de máis calidade”.
O Val de Quiroga de tapas desenvolverase ata o martes 26 de marzo e as tapas deberán estar a disposición do público entre as 12:00 e as 14:30 e as 19:00 e as 22:30 horas.
Os propios consumidores serán quen decidan coa súa votación cal é a tapa gañadora. Para iso terán que cubrir un tapacartón co selo de todos os establecementos que concursan e que se poñerá cada vez que o cliente deguste a tapa concursante. Unha vez cuberto, votarán á que ao seu xuízo merece ser a gañadora do concurso.
O establecemento gañador recibirá unha placa conmemorativa e 100 euros en metálico. Os participantes que completen a degustación das tapas e voten á tapa que máis lles gustou entrarán nun sorteo no que poden gañar diferentes premios.
Entre as recompensas aos comensais, 200 e 100 euros en metálico, experiencias gastronómicas, enoturismo, comidas para dous en diferentes establecementos e cestas de produtos típicos. Hai preto de 15 premios.
Diario de Quiroga 