O entorno do muíño de Bendilló acolleu hoxe a celebración da XIX edición da Mostra do Aceite de Quiroga, que un ano máis congregou a centos de visitantes arredor do aceite e o seu tradicional proceso de elaboración.
Esta mostra, declarada Festa de Interese Turístico de Galicia, ten como obxectivos poñer en valor, promocionar e recuperar o aceite de Quiroga.
Dende as 11:30h estivo en funcionamento o muíño de Bendilló, onde durante toda a xornada foi posible contemplar unha demostración da elaboración tradicional de aceite, un dos principais atractivos desta feira.
Este muíño é unha antiga almazara romana datada entre os séculos I e II da nosa era. Está situado a escasos metros da estrada N-120, na pista que conduce á aldea do mesmo nome, e forma un interesante conxunto arquitectónico xunto coa capela de San Xoán das Farrapas.
Nesta edición participaban cinco colleiteiros -Pedro Soto Losada, José Manuel López Maseda, Jesús Bao Mondelo, Jesús Arias Rodríguez e Manuel Mondelo Rodríguez-, pero tampouco faltaron outros postos de produtos de alimentación e artesanía típicos da bisbarra.
A mediodía tivo lugar unha cata comentada aberta a todo o público. As persoas encargadas desde acto volveron a destacar a excelente calidade dos aceites participantes.
Aos moitos visitantes que ateigaron o recinto feiral uníronse tamén un grupo de peregrinos da Asociación Cultural San Bartolomé de Hospital e mais da Asociación Socio Cultural da Comarca de Quiroga que están a realizar o Camiño de Inverno por etapas. Hoxe percorreron 28 quilómetros entre A Rúa de Valdeorras e Quiroga e aproveitaron para facer parada en Bendilló.
PODER VER TODAS AS FOTOS FACENDO CLICK AQUÍ
Diario de Quiroga 