REDACCIÓN | QUIROGA
A catedral de Lugo acolleu o acto de presentación dos deseños de pratería que engalanarán a Virxe dos Remedios da Ermida, despois da súa coroación canónica o día 9 de setembro, e que se financiarán integramente grazas á aportación das xoias familiares que doaron os veciños do val de Quiroga. O deseño é obra do restaurador malagueño Francisco Naranjo, que se encargou tamén de realizar diversas actuacións para conservar esta imaxe.
Nos traballos de restauración da virxe, que remataron neste mes, elimináronse elementos metálicos para suxeición da vestimenta e da coroa, ideando unha renovación da imaxe para expoñela no retablo da igrexa. Unha actualización iconográfica que facilitará a conservación da escultura e a contemplación dos fieis en todo o seu esplendor, revalorizando a súa calidade estética e a súa riqueza material.
A Virxe dos Remedios presentarase sobre unha peana de prata, con querubins, e tocada cun manto bordado en ouro sobre veludo azul que será obra de Taller de Bordados Artesanais Manuel Mendoza. Sobre a peana, unha media lúa con dúas estrelas e o anagrama mariano por excelencia, o ave maría, rematado por coroa imperial, en alusión á tan alta distinción que a soberana imaxe recibirá, o 9 de setembro.
A coroa que nimbará á Virxe, está inspirada noutros referentes marianos a nivel nacional, como é a Virxe do Pilar de Zaragoza, e nas pezas de xoiería representadas en moitos cadros do ámbito da pintura flamenca. O engarce mediante unha cinta entrelazada achega motivos ornamentais, como son as flores de lis, moi representativas da realeza das cortes europeas e raios luminosos rematados por estrelas, en alusión á pureza e á luz divina.
Nun intento de completar con simbolismo e mensaxes o conxunto, o seu autor, tivo en conta a gargantilla gravada coas primeiras palabras do anuncio do anxo Gabriel a María – “Ave María, Gratia Plena”- un elemento que foi descuberto no seu proceso de restauración e que agora adquire continuidade na aureola ao pechar a mesma cunha cinta gravada coa mesma tipografía, rezando os primeiros versos da cantiga de Alfonso X o Sabio, “Rosa dás rosas e fror dás frores, donna dás donnas, sennor dás sennores”.
A coroa para o Neno Xesús, que o protocolo obriga a coroar en primeiro lugar, destaca pola súa simpleza ornamental, limitándose a un anel rematado por 4 flores de lis e que confía a súa riqueza ao engarce de pedras preciosas e perlas.
O conxunto, deseñado por Naranjo, ten unha importante inspiración medievalista para axustarse mellor ao período de execución da imaxe dos Remedios, do s. XIV, cando, segundo a tradición, un peregrino inglés introduciuna en terras galegas no transcurso do seu camiñar cara á tumba do Apóstolo, quedando depositada por diferentes vicisitudes no cerro da Ermida.
O afamado prateiro malagueño Miguel Ángel Martin Cuevas, no seu taller coñecido como Ourivaría Montenegro, será o encargado da execución deste delicado traballo en prata de lei e chapado en ouro.
Diario de Quiroga 