Unha aposta polo dereito ao rural nas infancias con parada en Quiroga

REDACCIÓN | QUIROGA

---

O Rural Imaxinado, promovido pola cooperativa Outonía S. Coop, é un proceso de diagnose participada coas infancias de territorios rurais para tratar de abordar o dereito ao rural dende un enfoque de dereitos. A proposta pretende ter carácter continuo e consolidarse “como un proceso de investigación-acción participada que implique a diferentes territorios da provincia de Lugo, así como aos seus diferentes axentes, tendo como máxima a necesidade de reinterpretar as narrativas en torno á ruralidade”, sinalan.

Nesta primeira fase, o achegamento faise a tres centros educativos da provincia de Lugo, entre eles, o CEIP de Quiroga, onde a través dun total de tres obradoiros trabállanse co alumnado de segundo ciclo de primaria aspectos “como o sentimento de identidade e pertenza ao territorio, os estereotipos que atravesan o imaxinario rural e as posibilidades de xerar narrativas propias de futuro”.

Ademais, a proposta irá vinculada á creación dun material didáctico en formato fanzine que será publicado en aberto para poder achegar a metodoloxía a outros espazos, servindo como altofalante da voz das crianzas.

O Rural Imaxinado xorde dunha proposta piloto, desenvolta no marco dunha iniciativa que Outonía S.Coop desenvolveu en colaboración coa Rede Aldear e que inicialmente tivo como escenario seis centros educativos de concellos do interior de Lugo e Ourense, entre eles o de Seoane.

Dende esta entidade mantense a necesidade de concibir o territorio “como núcleo da identidade individual e comunitaria e, polo tanto, como un eixo educativo dende o que se poden traballar aspectos tan centrais para o desenvolvemento das persoas como a autoestima, o sentido da pertenza ou o apego”.

Así mesmo, as responsables de Outonía salientan que esta iniciativa contribúe “na necesaria aspiración de loitar contra o desmantelamento dos territorios rurais, constituíndose como un proceso que incide directamente na sensibilización, fomento do pensamento crítico e a necesaria toma de conciencia ante a necesidade de (re)pensar os rurais dende un enfoque de dereitos, plenitude e posibilidades”.