REDACCIÓN | QUIROGA
Este domingo 18 de febreiro celébranse Eleccións ao Parlamento de Galicia. No caso de Quiroga, o Censo Electoral publicado polo Instituto Nacional de Estatística (INE) recolle que teñen dereito ao voto un total de 3.763 electores.
A cifra pode resultar sorprendente, pois segundo o último censo poboacional o número de persoas censadas no municipio era inferior aos 3.100 veciños. Con todo, hai que ter en conta os residentes no estranxeiro, que poden votar sen solicitude previa e que segundo o INE ascenden a 1.086 electores. É o chamado voto de inscritos no CERA, o Censo Electoral de Residentes Ausentes.
En canto aos que si residen en Quiroga, o portal do Instituto Nacional de Estatística sinala que poderán exercer o seu dereito ao voto 2.677 persoas.
No caso de Ribas de Sil poderán votar 1.256 persoas, das que 811 pertencen ao censo de votantes que viven en España (CER) e as 445 restantes ao CERA.
Ata 1.390 electores poderán exercer o seu dereito ao voto no caso de Folgoso do Courel, dos que 917 persoas están inscritas no CER e 473 no de residentes no estranxeiro.
MÁIS cifras
Na circunscripción de Lugo poden votar 337.734 electores, dos que 268.076 residen en Galicia e case 70.000 no estanxeiro. Ao longo dos 67 concellos da provincia habilitaranse 398 locais electorais, nos que se instalarán 532 mesas de votación. Con respecto aos comicios de 2020 incorporáronse 7.784 electores que poderán exercer o dereito a voto por vez primeira.
En total, o próximo 18 de febreiro poderán votar 2.693.624 electores nas eleccións ao Parlamento de Galicia. Deles, 2.217.110 residen en Galicia e 476.514 no estranxeiro. Dos electores residentes en Galicia, 79.072 poderán participar por primeira vez nunhas eleccións ao Parlamento de Galicia, por cumprir 18 anos desde a anterior votación celebrada o 12 de xullo de 2020.
Diario de Quiroga 