REDACCIÓN | QUIROGA
O tirón do Quiroga Trail Challenge é incuestionable. A festa do trail galego celebrará unha nova edición na primeira fin de semana de febreiro e farao con arredor de 1.100 inscritos. Deste xeito, superará as previsións da organización, que, tras o ‘boom’ dos trails o pasado ano, desta volta agardaba uns 900 participantes.
A gran cantidade de deportistas que visitarán a comarca terá un impacto moi importante na economía local. Aínda queda un mes e xa non queda nin unha praza baleira para hospedarse durante esa fin de semana. Tamén os restaurantes e bares da vila prepararanse para unha fin de semana na que ven multiplicada a súa clientela.
Pero o impacto do Quiroga Trail Challenge comeza a notarse xa nestas semanas previas. Os diferentes percorridos do trail xa foron rozados e moitos dos participantes aproveitan para adestrar por eles e coñecelos antes da proba de lume, que chegará os días 4 e 5 de febreiro.
Por outra banda, dende a organización confirmaron que, logo de alcanzar o máximo de prazas dispoñible, pecharon as inscricións da andaina Coureleando. Outras das diferentes distancias do trail xa completaran as prazas hai semanas.
Diario de Quiroga 